فى القولد التقيت بالصديـق
عبدالرحمن علي طه
فى القولد التقيت بالصديـق أنعم به من فاضل ، صديقى
خرجت أمشى معه للساقية ويا لها من ذكريات باقيــة
فكم أكلت معــه الكابيدا وكــم سمعت اورو والودا
***
ودعته والأهل والعشيرة ثم قصدت من هناك ريره
نزلتها والقرشى مضيفى وكان ذاك فى أوان الصيف
وجدته يسقى جموع الإبل من ماء بئر جره بالعجـل
***
ومن هناك قمت للجفيـل ذات الهشاب النضر الجميل
وكان سفري وقت الحصاد فســرت مع رفيقى للبــلاد
ومر بي فيها سليمان على مختلف المحصول بالحب إمتلا
ومرةً بارحت دار اهـلى لكي أزور صاحبى ابن الفضل
ألفيته وأهله قد رحلـوا من كيلك وفى الفضـاء نزلوا
فى بقعة تسمى بابنوسـة حيث اتقوا ذبابة تعيســــة
***
ما زلت فى رحلاتى السعيدة حتى وصلت يا مبيو البعيدة
منطقة غزيرة الاشجــار لما بها من كثرة الأمطــار
قدم لى منقو طعــم البفره وهو لذيذ كطعام الكســـره
***
وبعدها استمــر بى رحيلى حتى نزلت فى محمد قـــول
وجدت فيها صاحبي حاج طاهر وهو فتى بفن الصيد ماهـــر
ذهبت معه مرةً للبحـــــر وذقت ماء لا كماء النهــــر
****
رحلــت من قول لودْ سلفاب لألتقى بسابع الأصحــــاب
وصلته والقطن فى الحقل نضر يروى من الخزان لا من المطر
أعجبنى من أحمد التفكيـــر فى كــــل ما يقوله الخبيرُ
***
ولست أنسى بلدة أم درمــان وما بها من كثرة السكـــان
إذا مرّ بي إدريس فى المدينة ويا لها من فرصـــة ثمينة
شاهدت أكداساً من البضائــع وزمراً من مشتر وبــــائعْ
***
وآخر الرحلات كانت أتبره حيث ركبت من هناك القاطره
سرت بها فى سفر سعيد وكان سائقى عبد الحميـــد
أُعجبت من تنفيذه الأوامر بدقة ليسلم المســـــافر
***
كل له فى عيشه طريقـة ما كنت عنها أعرف الحقيقـة
ولا أشك أن فى بــلادى ما يستحق الدرس باجتهـــاد
فإبشر إذن يا وطني المفدي بالسعي مني كــي تنال المجدا
أمونه بـــت الشيــــــــــخ حمــــد
من تراث الشايقية
أموني بت الشيخ حمد
أبوها زول مزواج خلاص
ناسب جميع ناس البلد
ميلاده كان عرساً كبير
هيصة وضبايح مالا حد
يوم السماية إتيتمت
حكم القدر في الأم نفد
كانت شبيهت أمها
في القدله والعود اللمد
في مره رف قليبها يوم
حبّت قريبها الشيح حمد
وأظن كمان حباها هو
سوا الضلوع لحبو سد
كاتمين غرامن في القلوب
ولع لهيبو وما برد
خايفين يصارحوا
ومايلقو للدايرنو رد
خايفين عيون الناس
تشوفهم والخبر يملا البلد
والحب هناك عيباً كبير
لا بت تبوحبو ولا ولد
في يوم ابوها ضحك كتير
وبرم شواربو بلا الأسد
نادّاها آمني تعالي جاي
وفوق البرش اتربع قعد
قالتلو هووي جاياك خلاص
قليبها فره ومارقد
قالّها
حاج الخضر عارفاهو داك
قالّتلو آيّ.... ابوسند؟
جاني الصباح طالب يداك
داير نسب شيخ البلد
وأنا قتلو أهلاً بيك تعال
يومين تلاته تكون عقد
راجل عظيم عندو القروش
عندو الحرير راقد لبد
وكمان كريم وأخو رجال
ماعونو فديوم ما برد
جرن الدموع من عينا شو
سكتت وابت تديهو رد
بس قام مرق خلاها فات
لو سبه لو كايس غرض
عند المغيرب تاني جاها
كدي لمحاسن الحاج سرد
داير ااثر في قلبه
لو كان تقوم تديهو رد
وكتين غلب وإحتار خلاص
وولع فوادو جمر وقد
فسر سكات البت رضى
جاب زولو ولما الناس عقد
المال مخمخم والحرير
تحت الرجول مدوهو مد
يوم الصفاح والناس تجوط
وبالفرحه مقلوبه البلد
أمونه تبكي بكى السواد
بدل الفرح جاها النكد
وبشيش قامت للمروق (( طلعت من البيت ))
منسرقي ماحسابا حد
كان الحبيب راقد هناك
والصدمي قدّت قلبو قد
وقفت قصادو بكت كتير
لامن دميع العين جمد
قام جاها بشوقو الكتير
وقليبو داك تنهده هد
قالتلو مابيدي شي
ديل ناس ابوي وابوسند
تلملمو وسوو الكلام
وأنا لا رضيت لا جبتا رد
داك عندو مالاً موقليل
وأبوي شاف المال سجد
أداني للراجل العجوز
المن عروقو الدم شرد
قايلني بسعد بالقروش
ولا المراح الماتورد
لكن محال أسعد بلاك
كان السما انهده هد
بديك قليبي وروحي ديل
وهناك بعيش صوره وجسد
واتراجعت دارت تصد ((ترجع البيت ))
لكن قليبه رجع رفض
ومسكت دريبن موغريب
كم بيهو صف بنوت ورد
قاصده البحر داير تموت
لا عيشه لا هم لا نكد
واترددت وقفت كتير
لامن قليبه خلاص صمد
شافت مسار النيل حزين
حتى النخيل حزنان خمد
وبشيش فكفكت الحرير
لا زيني لا ربيط عقد
مادام حياته بقت دموع
وقليبه من زولا انفرد
قالت اخير ارتاح خلاص
أرسى وشقاي ألقالو حد
وفي لحظه موج النيل علا
وفي جوفو غابت للابد
في لحظه موج النيل علا
وأمونه غابت للابد
