يا محمد أخيرلك
تحقب ها الهدام
وعقاب الفضل من عمرك
وتقبل أخير...
وشهايد الجامعه
تسيهن ليك بخرات
والخبرات
فى موية تموصن
تتكافابن شر المسغبه
والجفير...
والاشواق والريد
تناسهن
ورفاقة الزيف
الكانو معاهن
أصلو الوفا والضكره
وحاتك
فى الخرتوم
ضايع معناهن
بين اللكشر والكوفير...
أحسن ليك
صد لى غنيماتك
جبنة الضحوى مع خالاتك
شاى المغرب عن عماتك
خشم خشمين
بى فوق الحطيه
وآخر الليل عن حاج الخير...
أرجع سيلك
مسره وتايه
أزرع ليك تمنين بتيخ
جدعة مسمس
وفول أنقايه
وقضى نهارك فى الخدير...
شاسى ونم
والصيه تجادعك
وساعة المرقة
الحره توادعك
والايام بتطيب وتبادعك
الهبابى
وضل النيمه وموية الزير...
جت الحله الناس بتعرفك
أصلك
وفصلك
أهلك ونسلك
شيخ الحله
يوطى وإسالمك
ويات من فيها
يشابى يكالمك
كل الناس ساواك كبير...
الحبوبه
تشم و تقالدك
وأى كبير
تاج راسك ووالدك
والفى الداره يهز ويجالدك
وإبشر فيك
يامك بالخير...
مالك
بترخس روحك للخرتوم
والحله رجال وعوين
خاتك تاج راس
بنوت عمك أعاينن ليك
زى لبن الطير...
ياخ أرجع أخير...
